Sotir Ferrara është një ndër personalitetet e klerit dhe kulturës arbëreshe i cili sot do të festonte 83-vjetorin e lindjes.

Ai ka luajtur një rol shumë të rëndësishëm në kulturën e trashëgimisë shpirtërore arbëreshe, duke qenë për shumë vite në krye të Eparkisë së Horës së Arbëreshëve.

Ferrara është konsideruar si “mjeshtri i liturgjisë bizantine të traditës arbëreshe”, pasi ndikoi në përbashkimin shpirtëror e social të Arbëreshëve gjatë 25 vjetëve të punës së tij si dhespot (ipeshkëv) i Eparkisë së Horës së Arbëreshëve.

Kleriku lindi në këtë ngulim arbëresh, me 5 dhjetor të vitit 1937 dhe u nda nga jeta me 25 nëntor të vitit 2017. Ferrara ishte profesor i matematikës dhe i lëndëve shkencore, si dhe drejtor i Korit bizantin i Katedrales së Shën Mitrit, i cili ishte i përbërë nga Arbëreshët e Sicilisë.

Brenda Konferencës së Peshkopëve në Itali ishte anëtar i Komisionit për ekumenizmin dhe një nga zërat më aktivë në këtë lëmi.