Britania e Madhe është vendi i parë në botë që miraton vaksinën Pfizer/BioNTech për përdorim të gjerë.
MHRA, rregullatori britanik thotë se vaksina që ofron mbrojtje deri në 95% ndaj COVID është e sigurtë dhe do të nisë javën e ardhshme. Një lajm i mirë ky për mbi 20 mijë shqiptarë që jetojnë në Britani.
Imunizimet mund të nisin brenda ditësh për njerëzit në grupe me përparësi të larta thotë BBC.
Britania ka porositur plot 40 milionë doza, të mjaftueshme për të vaksinuar 20 milionë njerëz, me dy doza.
Rreth 10 milionë doza do të jenë në dispozicion së shpejti, me dozat e para që mbërrijnë në Mbretërinë e Bashkuar në ditët në vijim.
Bëhet fjalë për një lloj të ri vaksine mARN që përdor një fragment të vogël të kodit gjenetik të virusit për të mësuar kështu trupin se si të luftojë COVID-19 dhe të forcojë imunitetin.
Një vaksinë mARN nuk është aprovuar kurrë më parë për përdorim tek njerëzit, megjithëse njerëzit i kanë marrë ato gjatë eksperimenteve.
Ndërkaq, ekspertët kanë hartuar një listë me përparësi të përkohshme që synojnë njerëzit me rrezik të lartë. Kryesore janë azilet dhe personeli i shtëpive të kujdesit, të ndjekur më pas nga personat mbi 80 vjeç dhe punonjës të tjerë të kujdesit shëndetësor dhe social.
Kjo kategori do të nisë vaksinimin që javën e ardhshme. Ndërkaq, imunizimi masiv i të gjithëve mbi 50 vjeç mund të ndodhë pasi sasia të jetë e disponueshme në 2021. Bëhen dy injeksione me 21 ditë nga njëra-tjetra me dozën e dytë që është përforcuese.
