Suada Dare vite më parë nisi karrierën si valltare e Ansamblit të Rrajcës, ku ka përfaqësuar vendin në shumë evente. Por prej dhjetë vitesh ajo jeton në Londër dhe punon si menaxhere në një firmë shumë të suksesshme atje.
Suada tregon se në Londër ka nisur të ndjehet atmosfera festive e Krishtlindjeve. “Njerëzit mendoj që janë lodhur me gjithë situatën dhe duan diçka t’i shpëtojnë kësaj situate dhe janë më të përfshirë në këtë atmosferë”, thotë ajo.
Fillimi për të ka qenë i vështirë dhe thotë se gjashtë muajt e parë vetëm ka qarë, por që më pas u ambientua me Londrën dhe sot ka një punë të suksesshme.
Puna e saj është interesante teksa kompania ku punon “Tody&Boys” prodhon dritare dhe dyer që nuk janë standarde por shkon në shtëpinë e klientit dhe i kopjon ekzaktësisht, sidomos në një qytet si Londra ku ruajtja e traditës është e rëndësishme. “Po një projekt që kemi bërë ka qenë një dritare rrumbullake për kullën e Londrës dhe origjinalja isht 200-vjeçare dhe ne bëmë një replikë 100 për qind. Ajo ishte shumë intersante. Ka projekte të tjera dhe për individë”, thotë ajo.
Pasionin për kërcimin që ka pasur në Shqipëri, Suada tashmë për shkak të përshtatjes e ka me kërcimin latin. “Ngaqë e kam pasion kërcimin këtu nuk mund të vazhdoja kërcimet shqiptare tradicionale po gjeta një pasion për kërcimet latine. Kudo bëhen trajnime dhe gjithashtu disa herë në vit bëhen kongrese. Për mua gjatë vitit, këtë vit s’kam pas mundësi prej pandemisë, po pas punës preferoj të shkoj dy herë në javë të marr mësime kërcimi”, thotë ajo.
Përsa i përket shqiptarëve në Londër vetë Suada thotë se nuk ka marrë pjesë në ndonjë aktivitet organizatash shqiptare, por njeh shumë shqiptarë në Londër.
“Nuk e di unë them që të gjithë kombet e kanë që e njohin njëri tjetrin kudo që të jenë. Por mesa kam parë shqiptarët që kam takuar këtu janë integruar shumë mirë në shoqëri dhe pse jeta është shumë e vështirë gjë që më bën krenare se gjithmonë u tregoj miqve të mi jo shqiptarë që ku ka arritur këtë e ky atë. Propaganda që bëhet është e gabuar sepse shqiptarët nuk janë të këqij”, vijon ajo.
Por nga ndryshojnë shqiptarët nga anglezët? “Më pëlqen shumë humori anglez. Anglezët kanë një mënyrë shumë fine të të bërit humor dhe në fillim tallen me veten, para se të tjerët të tallen me ta. Kjo është një thyerje akulli, ata e nxjerrin shumë kollaj veten nga situatat në këtë mënyrë. Më pëlqen që i marrin gjërat me shumë sportivitet, janë shumë të lirshëm, nuk ka rëndësi nëse e njeh apo jo personin tjetër”, thotë ajo.
