• Rezart Sulçe, mjeku shqiptar në Itali, në një intervistë për “Euronews” tregon për situatën e koronavirusit në vendin fqinj dhe masat që po merren për të përballuar këtë valë të dytë. Ai flet edhe për pritshmëritë e publikut italian për vaksinën kundër Covid-19.

Mjeku shqiptar në Itali, Rezart Sulçe, tha se vala e dytë e Covid-19 po shfaqet më agresive. Sipas tij, ky trend faktohet nga numri i vdekjeve, rasteve të reja, por edhe i shtrimeve në spitale.

“Në Italia situata është e rëndë, edhe vala e dytë është më e rëndë së vala e parë. Sot kemi 700 të vdekur dhe 37 mijë raste të reja. 15 % e personave që bëjnë testin dalin pozitivë., tha ai.

I pyetur për protokollet shëndetësore që ndiqen nga Italia për të kuruar të prekurit me Covid-19, mjeku kirurg theksoi se nuk ka një protokoll standard.

“Në Siena, Toskana ku unë punoj jemi pothuajse në ezurimin  e plot të vendeve të lira. Nga marsi deri tani kemi një ndryshim të trajtimit të sëmundjeve të të shtruarit, sepse trajtimi që përdorej në mars nuk është i njëjti me atë tani. Për trajtimin e Covid-19 duhet gjithmonë të konsultohen me mjekun e familjes, këtu në Itali mjeku familjes përcakton nëse je për trajtim në shtëpi, ose shtrim në spital.

Duke qenë se rastet janë shtuar shumë ka rënë trajtimi i sëmundjeve të tjera shumë të rëndësishme dhe sidomos ne si mjek duhet t’i kushtojmë shumë kujdes edhe këtyre personave, duke mos i lënë pas dore. Është shumë e rëndësishme të respektohen masat. Italia sërish u gjend e papërgatitur për një valë të dytë kaq të fuqishme, por nga eksperienca që morëm nga vala e parë u veprua pak më shpejt, duke nisur që nga shtimi i vendeve në terapi intensive, plus pajisjet ishin më të shumta tani”, tregon mjeku shqiptar.

I pyetur për vaksinën anti-covid ai shprehet se lajmi është pritur mirë, por ka edhe disa kolegë që janë dyshues “Optimizëm ka për vaksinën, që nga janari do vijnë mbi 1 milion doza dhe lajmi është pritur me entuziazës, megjithëse ka shumë kolegë që janë shumë dyshues, sepse zbulimi i vaksinës si rregull zgjat me vite, ndërsa kjo vaksinë u zbulua shumë shpejt.”