Sot u zhvillua takimi online me temë “Puna, integrimi, pensionet”. Ky takim trajtoi si çështje kryesore kontributet shoqërore të individëve dhe të drejtën e pensionit.
Ky takim është promovuar nga sindikata “Fai Cisl”, sindikatë që mbron të drejtat e punëtorëve, nga sindikata “Inas Cils”, si dhe nga revista e qendra kërkimore “Confronti”.
Konferenca u përqendrua në diksutime mbi punën dhe rolin e shqiptarëve në Itali dhe veçanërisht për çështjen e pensioneve, meqë ende mungon një marrëveshje dypalëshe për njohjen e kontributeve në të dyja vendet.
Francesca Puglisi, Nënsekretare e Shtetit në Ministrinë e Punës dhe Politikave Sociale u shpreh e gatshme për të zhvilluar një tryezë sa më shpejt të jetë e mundur. “Ne kemi nevojë për një konventë mbi pensionet midis Italisë dhe Shqipërisë për të njohur periudhat kontributet e mbyllura në të dy vendet. Kjo temë është shumë e rëndësishme dhe ne e përkrahim, sepse pas shumë vitesh emigracioni nga shqiptarët ekziston rreziku për të mos arritur të drejtën për pension, ndërkohë që kanë punuar për shumë vite në Itali. Kjo është një çështje e rëndësishme, duke u nisur nga kontributet që shqiptarët kanë dhënë për shtetin tonë ndër vite. Është e domosdoshme që kontributi i tyre të njihet. Unë mendoj se është një çështje shumë e rëndësishme për drejtësi sociale, që punëtorët që kanë derdhur kontributet e tyre tí marrin ato më pas në formë pensioni.”
Gjatë seminarit fjalën e mori edhe udhëheqësi i FAI, Onofrio Rota “Italia tashmë ka përfunduar konventën bilaterale të sigurimeve shoqërore me vende të ndryshme jashtë BE-së si Argjentina, Brazili, Australia, Tunizia, Turqia dhe gjithashtu me vendet në zonën e Ballkanit, të tilla si Serbia, Mali I zi, Kosova, Bosja. Të gjitha marrëveshjet që njohin kontributet e paguara në çdo vend pasi të keni arritur moshën e pensionit. Nuk ka asnjë arsye pse mes Shqipërisë dhe Italisë, të cilët ndajnë një histori miqësie, lidhje historike, marrëdhënie ekonomike shumëvjeçare, të mos punojnë për një konventë dy palëshe. Është një betejë e drejtësisë sociale, e cila na është drejtuar, nga shqetësimet e raportuara nga kaq shumë punëtorë shqiptarë dhe ne jemi gati të bëjmë pjesën tonë.”
Senatori Tommaso Nannicini anëtar i komitetit parlamentar të sigurimeve shoqërore dhe organeve të ndihmës sociale theksoi se mjafton vullneti politik për ta zgjedhur këtë problem madhor. “Nëse ka vullnet politik që gjërat bëhen më të thjeshtë. Jemi përpara një temë për të drejtat e njeriut dhe një temë për lidhjen Shqipëri-Itali. Jam dakort që kjo marrëveshje ekziston me vende të tjera, por është pa kuptim që të mos ekzistojë me Shqipërinë që kemi një raport prej vitesh, ndaj duhet realizuar sa më shpejt. Unë do bëj maksimumin tim për këtë temë. Nëse do jetë vullneti i politikës rikthesoj se kjo gjë mund të bëhet shumë shpejt.”
Në fjalën e tij sekretari i shoqatës së CISL “Confederazione Italiana Sindacati Lavoratori” Giulio Romani foli mbi nevojën që ka kjo çështje për tu trajtuar me seriozitet. “Shqiptarët janë pjesë e vendit tonë prej vitesh dhe nuk mund të bëjmë sikur nuk shikojmë. Është shumë e padrejtë që politika që mos tregoi seriozitet me këtë temë kaq serioze mbi të drejtat e njeriut. Shqiptarët janë një komunitet që kanë kontribuar shumë për vendin tonë.”
Në konferencë folën gjithashtu përfaqësues nga Shqipëria, Anila Bitri Lani Ambasadore e Shqipërisë në Itali, zv/Ministri i Ministrisë për Evropën e Punët e Jashtme, Sokol Dedja.
Gjithashtu sociologu Rando Devole bëri një pasqyrim të studimeve bazuar mbi statistika për fuqinë punëtore shqiptare në Itali.
