Ilir Merja prej disa kohësh ka zgjedhur të jetojë në Zelandën e Re, inxhinier që aktualisht punon atje si shef sektori në një kompani për mirëmbajtjen e autostradave.
Në një lidhje me emisionin “Boeing” në Radio Travel ai tregon se si shkoi atje. “E kam ëndërruar gjithmonë të jem në këtë shtet, ashtu si e pata ëndërruar ashtu e gjeta. Ky është një vend i mrekullueshëm, mund të shëtis gjatë fundjavës këtu dhe vetëm fusha me bar, ferma të mëdha që të presin për turizëm dhe është i mrekullueshëm”, thotë Iliri.
Njerëzit atje e presin shumë mirë një të huaj dhe ai thotë se ka dhe nga shtetet e tjera dhe nuk ka parë asnjë lloj racizmi. “Nuk ka as azilkërkues sepse është shumë larg dhe nuk deporton dot”, thotë ai.
Ndërsa përsa i përket shqiptarëve, Iliri thotë se nuk janë më shumë se 150 vetë, ndërkohë që shqiptarë të Kosovës janë më shumë.
“Vetëm kosovarë kanë ardhur në 1998, rreth 700 shqiptarë nga Kosova, kurse numri shqiptarëve nga Shqipëria është i vogël, diku tek 150 vetë. Sigurisht që ka shqiptarë ne jemi kudo”, thotë Iliri duke shtuar se kur erdhi te puna aktuale nuk kishin dëgjuar për Shqipërinë, por tani e njohin.
Ilir flet dhe për punën atje ku thotë se janë njerëz të qetë që nuk flasin për volumin e punës por cilësinë. “Këta bëjnë mbledhje 30 minuta, 25 minuta flasin për sigurinë në punë dhe pesë minuta për punën”, vijon ai.
Ndërsa për situatën e krijuar nga COVID-19, ai thotë se Zelanda e Re shquhet për menaxhimin që i bëri pandemisë ku vetëm ditën e fundit në vendin me 5 milionë banorë është shfaqur vetëm një rast me koronavirus. Jeta vijon normalisht përveç aeroportit ndërkombëtar që është mbyllur.
