Më 19 nëntor do të nisë punimet Konferenca Virtuale “DIASPORA FLET 2020”, ku si temë diskutimi do të jetë përfaqësimi politik i Diasporës në vendin amë.
Në këtë panel virtual do të jetë i pranishëm dhe ministri i shtetit për Diasporën Pandeli Majko. Në diskutim do të marrin pjesë Liza Gashi, ish-zvendës ministre e Punëve të Jashtme dhe Diasporës në Kosovë, Mark Gjonaj, këshilltar bashkiak i qytetit të Nju Jorkut, etj.
Konferenca Diaspora Flet 2020 do të zgjasë tri ditë, 19-21 nëntor dhe synon të lidhë profesionistë të industrisë, biznese, komunitete, aktivistë dhe ekspertë nga e gjithë bota për të reflektuar mbi angazhimin e diasporës shqiptare në 20 vitet e fundit dhe për të eksploruar dhe reflektuar mbi rolin e saj në 20 vitet e ardhshme.
Konferenca e këtij viti është thurur rreth temës “GlobAL2020: Lidhu. Krijo. Bashkëpuno” që synon të eksplorojë mënyra në të cilat shqiptarët në të gjithë botën mund të ndikojnë pozitivisht dhe forcojnë bashkëpunimin ndërkombëtar, të kontribuojnë në rritjen e komuniteteve të diasporës dhe të bëjnë ndryshime domethënëse në jetën e atyre që jetojnë në vendet e origjinës.