“Change the world Fund” ishte projekti i Universitetit të Drejtësisë në Birmingham të Britanisë së Madhe, ku fituese e 5 mijë paund për nismën e saj u zgjodh Katie Landsboroug.

Ky projekt synon të mbështesë studentët që të kenë një impakt domethënës në çështjet sociale, ku krahas çmimit do të jepet dhe ndihma e specializuar për të fuqizuar studentët.

Krahas fitueses, Universiteti i Drejtësisë vendosi që 3 mijë paund t’ia japë nënkampionit të konkursit. Bëhet fjalë për shqiptarin Musa Nela.

Ai është lindur dhe rritur në Shqipëri para se të merrte azil në Britaninë e Madhe në 2017. Musa tani është në vitin e tretë në Universitetin e Drejtësisë dhe ka si qëllim të bëhet avokat në të ardhmen.

Pasi pati një proces të gjatë dhe të vështirë për të fituar azil në Mbretërinë e Bashkuar, ku ishte fëmijë, fushata e propozuar prej tij “Distress Signal”, synon të japë mbështetje më të mirë për azilkërkuesit e pashoqëruar, përmes mjeteve të lobimit që një kujdestar i caktuar të sigurohet për të miturit në këto situata të vështira.