Agim Kurti është larguar nga Shqipëria gjatë eksodit të vitit 1991 dhe jeton në Itali prej atij viti. Sot është një ndër biznesmenët më të suksesshëm në Milano ku ka restorantin e tij të njohur ku shkojnë VIP-at.

Duke folur në emisionin “Boeing 104.6” në Radio Travel dhe Premium Chanel Agimi tregon se sot Milano është e mbyllur totalisht dhe se funksionon vetëm sistemi “delivery” dhe “take away”.

“Jemi totalisht të mbyllur, mund të hapim vetëm shërbimin “delivery” dhe “take away”. Këto janë dy opsionet. Po duke menduar që zona ku jemi ne ke zyra qëndrore të shumë kompanive të mëdha dhe të gjithë punojnë smart working. Zona jonë është komplet e kuqe. Këtë radhë njerëzit e kanë marrë më me seriozitet”, thotë Agimi.

Përsa i përket anës ekonomike Agimi thotë se shteti ka premtuar subvencionim por që ende nuk është marrë asgjë.

Duke treguar fillimet e tij të vështira, puna e parë si picier, emigrimi nga Italia në Gjermani e deri tek hapja e restorantit të tij, një histori suksesi frymëzuese.

“Kur u nisëm me anije nuk e dinim as ku do shkonim, disa në Greqi, Angli, Amerikë ishim totalisht out. Jo si sot që të rinjtë dinë gjithçka, kanë internetin, Facebook, Instagram. Ishim të paditur.
Ne shikonim një picë e nuk e kishim dëgjuar. Ato momentet e para ishe njeriu më i lumtur”, rrëfen Agimi. Ai thotë se shqiptarët bënin çdo lloj pune nga kureshtja dhe dëshira për të bërë diçka.

Agimi tha se në restorantin e tij kanë qënë: Dua Lipa, Ava Max, James Blunt, Luis Fonzi, si dhe shumë personalitete të politikës dhe medias në Itali.

“Dua është një mike, sa herë që vjen në Milano vjen tek ne, babai Dukagjini, i njoh familjen. Ava Max është një gocë kaq e ëmbël, ishte një suprizë dhe për ne. VIP tekanjoz nuk mund të them se ka ndonjë”, thotë ai.

Ai është një shembull i vërtetë suksesi dhe me krenari thotë se me suksesin e tij krenohen të gjithë shqiptarët që jetojnë në Milano.