Avni Orllati, biznesmeni shqiptar në Zvicër, ishte një nga 15 personalitetet e nominuar si finalist për çmimin “Sipërmarrësi i Vitit 2020” në Zvicër.
Më 30 tetor janë ndarë pesë çmime “Sipërmarrësi i Vitit 2020” në një ceremoni virtuale për shkak të pandemisë dhe biznesmeni shqiptar ka arritur të jetë një prej fituesve.
Avni Orllati është i njohur për kompaninë e tij të madhe nërtimore “Groupe Orllati S.A”. Kjo kompani ka marrë pjesë në ndërtimin e një prej kullave më të larta që ka nisur ndërtimin në Lozanë në vitin 2017. “Quartier des Cèdres” është një projekt ambicioz, i cili mendohet se do të finalizohet deri në vitin 2025. Një kompleks ekologjik prej 11.000 m2, me 17 ndërtesa, 700 banesa dhe 1600 banorë të rinj.
Nga 15 finalistët, juria ka zgjedhur pesë fitues, në pesë sektorë të ndryshëm të biznesit në Zvicër. Në mesin e tyre është edhe Avni Orllati, i cili lajmin e ka bërë vetë të ditur nëpërmjet një postimi në faqen e tij në facebook.
60 sipërmarrës nga e gjithë Zvicra kanë qenë të kandiduar për të merituar këtë çmim.
Avni Orllati është fitues në kategorinë “Industri / High Tech / Life Sciences”. Ai është vlerësuar për punën e tij plot sfida, duke treguar në këtë mënyrë një histori frymëzuese si themelues.
Në vitin 1997, në moshën 21 vjeçare, Avniu dhe vëllai i tij binjak krijuan biznesin e tyre duke marrë me qira një makinë që thyen betonin, transmeton albinfo.ch. Sot Orllati është një ofrues kryesor në fushën e “ndërtimit të gjelbër” dhe punëson mbi 850 persona në Zvicrën perëndimore.
Kompania e tij është e specializuar në të gjitha fushat e punëve ndërtimore përgatitore.
Avni dhe Basri Orllati në vitin 1995 vendosën të krijojnë kompaninë e tyre “A.Orllati”. Në vitin 1997 bashkohet me kompaninë vëllai i tyre Gjevgjeti dhe krijojnë kompaninë e tyre të re Orllati S.A., duke u bërë një nga kompanitë më të mëdha zvicerane, shkruan albinfo.ch. Në vitin 2012 kompania transformohet në Grupin Orllati S.A.
Vëllezërit Orllati janë një shembull i veçantë suksesi i diasporës shqiptare në Zvicër. Shumë shqiptarozviceranë janë krenarë me suksesin e tyre. Ata deri më tani kanë realizuar mbi 1000 objekte ndërtimi në Zvicër.
Grupi Orllati, me më shumë se 800 punonjës, është sot një nga furnizuesit kryesorë në sektorin e ndërtimit në Zvicrën frankofone.
Historiku rrugëtimit drejt suksesit të sotshëm
Historia e suksesit të Avni dhe Basri Orllatit filloi në vitin 1995 kur ata vendosën të krijojnë kompaninë e tyre “A.Orllati”, ata njihen shumë shpejt, sepse ishin punëtorë, të besueshëm dhe në dispozicion.
