Kryesia e Këshillit të Mësimit Shqip për Diasporën (KMSHD), në mbledhjen e radhës  prezantoi anëtarët e rinj të KMSHD-së, të cilët janë përfaqësues të komunitetit  arbëreshë, shqiptarëve në Turqi dhe Mal të Zi, Michele Greco, Musa Pali dhe Ganimet Secc.

Anëtari i ri Michele Greco e cilësoi këtë nismë, si një nismë që bashkon të gjithë shqiptarët rreth gjuhës shqipe dhe duke ruajtur gjuhën dhe rrënjët shqiptare. Po ashtu foli edhe për ruajtjen e gjuhës së vjetër Arbëreshe, i cili theksoi se në gjuhën e sotme shqipe po futën pa nevojë fjalë të huaja.

Ganimet Secc shqiptare e brezit të katërt, të shqiptarëve në Turqi, e emocionuar u shpreh: “Unë do të doja ta njohë shqipen si Michele Greco, sepse edhe unë jam shqiptare dhe do të bëj përpjekje në të ardhmen që të jem sa më afër rrënjëve të gjuhës shqipe.”

Mësuesi shumëvjeçar në Diasporë Musa Pali, rikujtoi edhe njëherë punën e tij me nxënësit e shkollave shqipe, përpjekjet e tij dhe të kolegëve për ta mbjellë jo vetëm gjuhën shqipe por edhe atdhedashurinë te fëmijët e mërgimtarëve shqiptarë, të cilët lindin dhe rritën larg atdheut.

Te të gjithë anëtarët vihet re dashuria për origjinën, anëtarët e rinj kanë marrë përsipër t`i shërbejnë me gjithë vullnetin dhe dëshirën e madhe gjuhës dhe kulturës shqiptare.

Ky takim  erdhi pas kërkesës së Kryesisë së KMSHD për një takim prezantues me antarët e rinj.