Ministri i Shtetit për Diasporën, Pandeli Majko ka zhvilluar një takim online me përfaqësues të institucioneve të Ministrisë së Brendshme dhe Agjencisë Kombëtare të Shoqërisë së Informacionit (AKSHI) të cilët do të realizojnë procesin e regjistrimit të adresave të shtetasve shqiptarë që jetojnë jashtë dhe regjistrimin e shtetasve shqiptarë që jetojnë jashtë vendit dhe do të shprehin dëshirën për të marrë pjesë në zgjedhjet në Shqipëri.
Gjatë këtij takimi u diskutua lidhur me këto dy procese të cilat janë të ndryshme dhe të pavarura nga njëra-tjetra.
Regjistrimi i adresave të shtetasve shqiptarë jashtë vendit do të realizohet nëpërmjet një sistemi, ku personat e do të identifikohen dhe do të kenë mundësi të ndjekin të gjitha hapat e procesit. Vlen të theksohet se ky nuk është një regjistrim detyrues, por një mënyrë për tu identifikuar dhe për të përfituar shërbimet e shtetit shqiptar.
Ndërsa regjistrimi për të votuar në zgjedhjet e vitit 2021 do të jetë një proces veçmas këtij sistemi, çka do të thotë që duke bërë regjistrimi i adresës së banimit nuk do të fitohet automatikisht e drejta për të votuar.
Sa i takon mënyrës së regjistrimit për të marrë pjesë në zgjedhje ajo do të paraqitet në një moment të dytë, pasi të formohet Komisioni Qendror i Zgjedhjeve.
