Tashmë është zyrtare, Mërgim Vojvoda, bëhet lojtar i Torinos, duke shtuar kështu koloninë e shqiptarëve në Serinë A italiane.

Mbrojtësi i përfaqësueses së Kosovës, i cili mbërriti në Malpensa dy ditë më parë për të kryer vizitat dhe më pas për të nënshkruar kontratën, tashmë është nën urdhrat e trajnerit, Marco Giampaolo .

Lajmi bëhet i ditur nga klubi i Torinos, ku shkruhet:

“Klubi i Torinos është i lumtur t’iu njoftojë se ka blerë kartonin e Mërgim Vojvodës nga Standard Liege. Mbrojtësi ka nënshkruar një kontratë katër vjeçare”.

25-vjeçari Vojvoda më parë ka luajtur për Sint-Truidense, Mouscron në Belgjikë dhe  Carl Zeiss Jena në Gjermani.

Ai gjithashtu ka qenë lojtar i shpresave të Kombëtares shqiptare, por në fund vendosi që të përfaqësonte Kosovën.

Në një deklaratë të para disa kohëve, Vojvoda ka folur për vështirësitë që ai ka kaluar gjatë luftës duke treguar vuajtjet që kanë hequr.

“Kemi jetuar në mal për disa muaj duke u ikur bombave. Kemi udhëtuar me traktorë duke u fshehur në thasë gruri, kemi fjetur në qiell të hapur duke luftuar me urinë dhe të ftohtin”.