Këngëtarja shqiptare me famë botërore, Rita Ora, në bashkëpunim me UNICEF Kosova ka publikuar një mesazh për të gjithë shtetasit e Kosovës.
“Jam shumë e shqetësuar që shumë njerëz në Kosovë janë të prekur nga Coronavirusi. Ju lutem mbroni veten dhe të dashurit tuaj, vendosni maskën, respektoni distancën sociale dhe kujdesuni për higjienën tuaj.
Unë e vendos maskën sa herë që dal nga shtëpia, në mënyrë që të vijë sërish në Kosovë të ju dhe të festojmë përfundimin e këtij virusi.
Ndriçoni me dritën tuaj, vendosni maskën. Ju dua”, thotë Rita Ora në mesazhin e saj.
Rita Ora para pak kohësh mbajti një koncert në shtëpi për t’ju ardhur në ndihmë fëmijëve që janë prekur nga pandemia e koronavirusit.
Gjithashtu Rita dhe UNICEF para një javë kanë publikuar një nismë të re për të mbledhur fonde, ku gjithkush që dhuron para do të ketë mundësinë që të pijë një çaj me Ritën.
“Hej të gjithëve, unë jam Rita Ora, dhe si një ambasadore e UNCEF-it, unë jam duke mbledhur para për gjeneratën e prekur nga COVID-19. Krejt çfarë duhet te bëni është të dhuroni diçka për të pasur një shans të pini një çaj me mua. Nuk ka rëndësi se sa dhuroni, krejt paratë shkojnë 100 për qind për bamirësi. Faleminderit për të gjitha dhurimet tuaja”, u shpreh këngëtarja shqiptare në videon e publikuar në “Facebook” vetëm një javë më parë.
