Sulmuesi Edi Sylisufaj do t’i bashkohet përfaqësueses së Kosovës. Kjo është bërë e ditur të premten nga Federata e Futbollit e Kosovës (FFK).

Sulmuesi 20-vjeçar po shkëlqen këtë sezon me fanellën e skuadrës suedeze Falkenbergs, pasi ka shënuar 2 gola që prej nisjes së kampionatit në këtë vend, në muajin qershor.

“Ai më parë ka qenë edhe pjesë e Kombëtares U17 të Suedisë, derisa vlerësohet si njëri nga futbollistët më të talentuar. FFK-ja tashmë ka filluar procedurat rreth rregullimit të dokumenteve të nevojshme për lojtarin dhe nëse gjithçka kryhet me kohë, atëherë ai do të mund të paraqitet në fanellën dardane qe prej shtatorit në ndeshjen kundër Anglisë U21 në Prishtinë, teksa shumë shpejt mund ta shohim edhe në fanellën e Kombëtares A, ngase bëhet fjalë për një sulmues tejet të spikatur”, thuhet në njoftimin e FFK-së.

Sylisufaj është me origjinë nga Tropoja, por ka lindur në Suedi. Vlera e tij në treg llogaritet rreth 500 000 euro.

Karrierën e ka filluar po tek Falkenbergs dhe në 4 vitet e fundit është aktivizuar në 51 takime në total ku ka realizuar 9 gola.

Nuk dihet nëse kombëtarja e Shqipërisë i ka bërë ftesë apo jo, por vlen të theksohet se ai ka 2 psaaportizime, atë të Suedisë dhe atë të Kosovës.