Duke nisur që nga dita e hënë, datë 22 qershor, do të rinisin fluturimet e rregullta ndërkombëtare për dhe nga Aeroporti Ndërkombëtar i Tiranës.
Ministria e Infrastrukturës dhe Energjisë në bashkëpunim me Autoritetin e Aviacionit Civil po ndërmerr hapat e nevojshëm për rifillimin në mënyrë graduale dhe të sigurt të aktivitetit të transportit ajror.
Ministria e Infrastrukës dhe Energjisë thekson se: “Prioritet i veprimtarisë në kontekstin në fjalë është rivënia në funksionim e transportit ajror në përputhje me rregullat parandaluese dhe mbrojtëse të sigurisë së shëndetit, hartuar sipas rekomandimeve dhe udhëzimeve të organizmave ndërkombëtarë të aviacionit civil dhe atyre të shëndetit publik”.
“Duke mirëkuptuar e mbështetur dëshirën dhe nevojën e shoqërive ajrore që kanë rezervuar fluturime të rregullta ndërkombëtare për dhe nga Aeroporti Ndërkombëtar i Tiranës, për të nisur sa më shpejtë aktivitetin e tyre, dëshirojmë të konfirmojmë se të gjitha përpjekjet po ndërmerren nga autoritetet shtetërore shqiptare për të mundësuar rifillimin e fluturimeve në mënyrë të koordinuar dhe të organizuar me shtetet partnere me të cilat zbatojmë Marrëveshje të Shërbimeve Ajrore”, bën me dije MIE.
Nga data 22 qershor 2020, shoqëritë ajrore duhet të marrin masat e nevojshme për të bërë të mundur rezervimin e fluturimeve për dhe nga Aeroporti Ndërkombëtar i Tiranës.
