Gjuha për shqiptarët ka qenë gjithmonë elementi lidhës, fija që i ka mbajtur të bashkuar, brenda trojeve shqiptare dhe në mërgatë. Sot falë teknologjisë vepra të cilat kanë shënjuar historinë e kombit dhe historinë e letërsisë shqiptare mund të lexohen online, kjo në saj të finalizimit të projektit “Digjitalizimi i veprave shqiptare” të realizuar nga Fondi Shqiptar për Zhvillimin e Diasporës.
Janë rreth 100 vepra të autorëve më të njohur shqiptar, brenda dhe jashtë vendit të cilat gjenden në formatin digjital në këtë platformë.
Në faqen elektronike Digjitalizimi i Veprave Shqiptare, (https://adld.al/) veprat janë të ndara në tre kategori, klasikët, letërsi bashkëkohore dhe letërsi për fëmijë.
Ndër klasikët mund të lexohen në këtë format kryeveprat e rilindjes kombëtare, poema epike e At Gjergj Fishtës, “Lahua e Malësisë”, “Bagëti e Bujqësi” e Naim Frashërit, së bashku me “Lulet e Verës” dhe “Historinë e Skendërbeut”, vepra e plotë e arbëreshit Jeronim De Rada, etj.
Vepra të cilat përbëjnë themelin e letërsisë kombëtare shqiptare dhe që kanë ndikuar në zgjimin e ndërgjegjes kombëtare të cilat edhe sot mbartin mesazhe aktuale.
Autorët bashkëkohorë dëshmojnë një tjetër etapë të historisë së letërsisë shqiptare padiskutim e ndikuar nga realiteti shqiptar. Fatos Kongoli, Zija Cela, Fatos Lubonja, Bashkim Shehu, Azem Shkreli, Ali Pdrimja, Dritëro Agolli janë disa prej autorëve pjesë e këtij koleksioni digjital.
Ky projekt ambicioz synon të përmbushë një nevojë urgjente dhe të domosdoshme të mungesë së shumë veprave shqiptare në formatin digjital.
Aksesi në këtë bibliotekë virtuale të letërsisë shqiptare është falas dhe librat mund të shfletohen me lehtësi në të gjitha aparatet teknologjike.
Platforma e realizuar si pjesë e projektit Diaspora për Zhvillim është krijuar me qëllim gjallërimin dhe promovimin e kujtesës kolektive kulturore të komunitetit të Diasporës shqiptare si dhe krijimin e kushteve dhe nxitjen e angazhimit kulturor të anëtarëve të Diasporës shqiptare.
Digjitalizimit të veprave shqiptare i kushtohet një rëndësi e veçantë në Strategjinë Kombëtare për Diasporën, të hartuar nga Ministri i Shtetit për Diasporën si një instrument për përcjelljen dhe ruajtjen e trashëgimisë gjuhësore e kulturore shqipe në Diasporë.
*Ndalohet kopjimi, riprodhimi dhe publikimi i intervistës pa cituar burimin “Diaspora Shqiptare”.
