Teuta Muhollari, mjeke dhe kërkuese shkencore e Toksikologjisë Mjedisore në Hungari, tregon për televizionin “Dukagjini” për përballjen me pandeminë në këtë shtet dhe jep disa këshilla për moskonsumimin e alkoolit gjatë pandemisë.

Për herë të parë nga studimet e kryera në Hungari për efektet e alkoolit, do të ketë rezultate për Shqipërinë.

Nga fillimi i pandemisë dhe deri tani në Hungari janë prekur nga COVID-19 rreth 3954 persona, 534 janë viktima, dhe diku tek 60% janë shëruar. Ndërkohë në Hungari janë bërë rreth 200 mijë testime për të gjithë popullatën, duke marrë parasysh edhe faktin që ka diku tek 9.7 milionë banorë, dhe rreth 11 mijë persona janë akoma në karantinë të detyruar në shtëpitë e tyre.

Sipas Teutës kjo javë është shumë e rëndësishme sepse qeveria hungareze do të vendosë nëse do ta vazhdojë apo do të heqë gjëndjen e emergjencës.

“Mesa kam parë unë në media ka pasur debate në lidhje me fushën time pra me Teksikologjinë dhe madje këshillonin konsumimin e alkoolit, më saktë të rakisë kundër COVID-19. Kjo nuk është një këshillë e vlefshme sepse konsumi i alkoolit është nga ato gjërat që ul imunitetin e njerëzve në tërësi dhe në këtë pandemi do të bënte të njëjtën gjë. Kjo sëmundje shkaktohet nga një patogjen i cili ka shenjëstruar imunitetin dhe përdorimi i alkoolit nuk mund të jetë një zgjedhje e mirëmenduar për të luftuar pandeminë”, shprehet Teuta.

Ndërsa përsa i përket dezifektuesve me bazë alkooli ajo shprehet se ato janë efektive në këtë situatë. Gjithashtu përsa i përket menaxhimit të situatës Teuta thekson se në krahasim me vendet e Europës, ajo është menaxhuar mirë. Por kjo nuk do të thotë se rreziku ka kaluar sepse virusi ende po qarkullon.