Platforma për mësimin e gjuhëve në internet “Babbel” ka realizuar një video me arbëreshët e Italisë së Jugut, duke e klasifikuar gjuhën arbëresh si një ndër gjuhët që rrezikojnë të zhduken. Arbëreshët shihen teksa flasin dhe interpretojnë vargje të këngëve të tyre tradicionale.

Gjuha arbëreshë flitet në disa zona të Italisë për më shumë se 5 shekuj. Mbërriti në gadishull nga Shqipëria, së bashku me disa shqiptarë që ikën nga përparimi i Perandorisë Osmane. Të mbështetur fort te njëri-tjetri, ata krijuan një realitet shpirtëror, i cili u bë barriera e parë për t’u mbrojtur nga rreziqet e asgjësimit.

Arbëreshët kanë manifestuar një ndërgjegje të lartë etnike. Duke e mbajtur të gjallë kujtimin e atdheut, kujtimin e zulmeve të një kohe heroike, duke kultivuar zakonet e kulturën e tyre të jetesës, duke përdorur fjalët e një gjuhe plot magji, siç është gjuha e mëmës.

“Ti arbëresh që gjuhën e mëmës nuk e harron, ti që veten e ktheve në muaj, ti që jetën ndërton në dhe të huaj” – janë këto vargjet e këngës tradicionale “Gjuha jonë”, që interpretohen nga një arbëreshë në videon e platformës “Babbel”.