Erion Dasho, Drejtor i Shëndetit dhe Inovacionit në Frankfurt tregon për hapjen e ekonomisë në Shqipëri. Kjo sipas tij është hapje e vonuar dhe se duhet të ishte bërë javë më parë, pasi situata epidemologjike në vend ka qenë e qetë.
“Në fakt situata në Shqipëri ka qenë e qetë që prej fillimit, me një numër rastesh i cili ka qenë i kontrolluar. Ekspertët arrijnë në përfundimin se masat që nga muaji prill dhe deri në momentin që flasin kanë qenë të tepruara. Në muajin mars kishin kuptim ato masat për të mos kaluar në një situatë si veriu i Italisë, por në prill dhe maj këto masa ishin të panevojshme”, shprehet Dasho.
Ai flet edhe për rrezikshmërinë e virusit sipas studimeve të bëra ku thotë se COVID-19 nuk është aq i rrezikshëm sa thuhej në momentet e para të shfaqjes së tij.
“Vdekshmëria nga COVID-19 është 3 persona për 1000 të infektuar ndërsa vdekshmëria nga gripi është 1-2 persona në 1000 të prekur. Pra vdekshmëria nga koronavirus nuk është në përmasa aq të mëdha sa parashikohej. Tani që po vjen stina e verës virusi do të përhapet edhe më ngadalë për shkak se nuk ka lagështi në ajër. Kjo do të na mundësojë të jetojmë një verë normale”, thekson ai.
Sipas Dashos pas daljes së vaksinës ajo nuk do të aplikohet tek çdo person pasi nuk është e arsyeshme, por do ta bëjnë personat që janë të rrezikuar si të moshuarit apo personeli mjekësor.
“Vaksinat kundër koronaviruseve nuk krijojnë imunitet të përhershëm por sezonal dhe prandaj ato duhet të futen tek vaksinat e detyrueshme. Ajo që mendoj unë se është strategjia e duhur është krijimi i imunitetit të grupit dhe arritja sa më shpejt në periudhën ku 60-70% e popullsisë të ketë kaluar infeksionin”, përfundon Dasho.
Burimi origjinal, këtu:
