Ekspertja shqiptare e turizmit, Sara Gezdari, e cila jeton prej 23 vitesh mes Italisë dhe Britanisë, thotë se sektori që mbulon do ta ketë më të vështirë nga të gjithë për të rinisur aktivitetin pas pandemisë Covid-19. Ajo tregon në një intervistë për Opinion faktorët e krizës që po përjeton sektori i turizmit.
“Ndikon shumë disponibiliteti ekonomik. Nëse njerëzit nuk kanë lekë, nuk shkojnë për pushime.Pushimet nuk janë prioritare. Gjëja tjetër e cila është jashtëzakonisht e rëndësishme, ndjenjat. Nëqoftëse njerëzit kanë frikë dhe nuk ndihen të sigurt, nuk udhëtojnë. Një nga shembujt është Egjipti, që deri para atentateve ishte një nga shtetet që po krahasohej me Italinë, për nga vizitat, cilësia dhe çmimet.Pas atentateve, operatorët nuk ndihen të sigurt nëse duhet të hapin lidhjet me vendet e tjera”, thotë Sara Gezdari.
Duke u nisur nga jeta e ndarë mes Italisë dhe Britanisë, ku është e angazhuar përgatitjet e fushatave të Partisë Konservatore, Sara i merr këto dy vende si shembuj për krizën turistike.
“Në Britaninë e Madhe GDP turistike është rreth 10-12%, ndërsa rreth 13% është në Itali. Britania e Madhe punëson me turizmin 3.1 milionë njerëz, kurse Italia ka numrin më të madh të punëtorëve në turizëm, 4.2 milionë. Të gjithë këto njerëz në këto momente nuk po punojnë, po mbahen nga ndihmat shtetërore. Britani jep rreth 80% të rrogës, një maksimum prej 2500 paund. Kurse Italia, akoma nuk ka filluar. Ka konfirmuar ndihmën por ende s’ka filluar të paguajë njerëzit. Mos të harrojmë, Italia ka qenë e para që ka mbyllur aktivitetin. Kështu që, ka një kohë më të gjatë mbylljeje sesa Britania e Madhe. Pra, shumë kompani janë përballur me vështirësi të këtij lloji”, shprehet Sara.
