Shqiptari Antan Metaj ka ndërmarrë nismën për të ndihmuar Shqipërinë me 8 ton materiale mjekësore në luftën kundër pandemisë Covid-19.
Në një intervistë për “Opinion” Metaj, drejtues i bordit të kompanive “Rise Enterprise” në Katar, u shpreh se nuk kërkon të marrë kredibilitet për këtë kontribut. “Nuk kam bërë asgjë prej gjëje, thjesht kam shfrytëzuar kontaktet dhe afrimitetin që kam patur me persona të cilët kanë në dorë diçka. Këtë gjë do e bëja kurdoherë për vendin tim”, tha Antani.
“Nga kontakti që kam patur me ambasadorin tonë, jam në dijeni se në vend janë dërguar rreth tetë ton ndihma, pajisje spitalore, mjete për ta bërë më të lehtë punën e mjekëve”, shtoi ai.
Antani u ndal edhe tek situata aktuale në Katar. Ai tregoi se ende nuk është kaluar kurba maksimale e pandemisë Covid-19, ndërkohë që çdo ditë janë duke u shënuar mbi 1000 persona të infektuar.
