Të nderuar bashkatdhetarë, Të nderuar anëtarë, Të nderuar sipërmarrës,
Sfida e mëdha që sot po jeton njerëzimi, siç është COVID-19, nuk mund të na ndalin rrugëtimin tonë të vllazërimit drejt suksesit të përbashkët.
Ndaj në këto ditë plot ngjyra feste, kam kënaqësinë t’ju përshëndes dhe t’Ju uroj, jo vetëm si kryetar i Dhomës së Biznesit të Diasporës, por edhe si qytetar dhe bashkatdhetar i Juaj.
Me krenari, i shpreh mirënjohjen time skuadrës së Dhomës së Biznesit të Diasporës Shqiptare dhe Gazetës së Diasporës Shqiptare, që duke qëndruar së bashku si një familje, të udhëhequr nga misioni, përgjegjësia, disiplina dhe devotshmëria kanë arritur të realizojnë projekte të suksesshme në shërbim të anëtarëve, duke sjellë shembujt e shkëlqyer të shqiptarëve anembanë.
Nga ana tjetër dua të falenderoj në mënyrë të veçantë të gjithë anëtarët, sipërmarrësit, bashkëpunëtorët, sponsorët dhe qeverinë shqiptare për mbështetjen e tyre të pakursyer në këtë periudhë krize. Eksperiencat e tyre, këshillat dhe besimi tek ne, na kanë krijuar hapësira të reja.
Por sot më tepër se kurrë të gjithë e kemi kuptuar se sa e rëndësishme është që të jemi bashkë, të bashkëpunojmë hapur dhe të ndajmë idetë dhe eksperiencat tona.
Kjo periudhë festash le të jetë një moment i qartësimit të vizionit për t’i paraprirë kërkesave tuaja të mirëpritura nga ne, për bashkëpunim, partneritet, investim, për të gëzuar një vit të ri shumë më të mirë.
Rrjetëzimi ynë, është shumë më shumë se një fjalë; “Të bësh biznes kudo në botë duke folur gjuhën tënde” është potenciali që nuk njeh kufij.
Le ta vazhdojmë punën tonë së bashku për të forcuar akoma më shumë sipërmarrjen që flet shqip në çdo cep të botës. Le ta lidhim konsumatorin shqiptar kudo në botë me shijen dhe emocionin e ndjenjës së vllazërimit. Le të krijojmë së bashku performancën e standardeve të produkteve dhe shërbimeve shqiptare dhe ti shërbejmë kryesisht njëri – tjetrit.
Ju shpreh me përzemërsi, falenderimet e mia më të sinqerta për secilin nga ju, që na mbështesni dhe respektoni, dhe besoni në vizionin e përbashkët.
Dhoma e Biznesit të Diasporës Shqiptare është familja Juaj pa kufij.
Gëzuar Festat e fundvitit dhe një Vit të Ri sa më të mbarë, plot shëndet, begati dhe suksese për Ju dhe të dashurit tuaj!
Ardian Lekaj
Kryetar i Dhomës së Biznesit te Diasporës Shqiptare
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
