Një nisëm tjetër po merr jetë në qytetin e Peshkopisë. Shumë vite me parë intelektualë të njohur të trevës së Dibrës kërkuan ndërtimin e Rrugës së Arbërit dhe ajo tashmë po bëhet realitet.
Një nga nismëtarët është Hysen Uka, një intelektual i njohur në Dibër e më gjërë. Ai dhe personalitete të kësaj zone janë angazhuar në realizimin e një tjetër investimi madhor.
“Ftojmë të gjithë të interesuarit, qytetar, parti politike, deputet e të zgjedhur vendor, grupe interesi, media, shoqata të ndryshme jo qeveritare, të marrë pjesë në një takim të lirë, me datë 16 qersor 2021, orën 12.00 në ambjentet e Pallatit të Kulturës, për paraqitjen e nismës project-ide, për ndërtimin e Rrugës Lidhja e Prizrenit.”, shkruan Hysen Uka në rrjetet sociale.
Ai shprehet se përmbajtja dhe qëllim i nismës është: ndërtimi i rrugës Lidhja e Prizrenit, një projekt i infrastrukturës rrugore, përgjatë bregut lindor të Luginës së Drinit të Zi, (Ujmbledhësit të HC-Skavicës), i cili lidh Rrugën e Arbrit me Aeroportin Zayed-Flatra e Veriut dhe Rrugën e Kombit, në Kukës.
Nisma konsiston në përgatitjen e opinionit mbarë dibran, jo vetëm të banorve të Luginës së Drinit të Zi, të cilët preken nga ndërtimi i HC-Skavices, të ndërtojmë një mendim e qëndrim të përbashkët, për të qenë partner e bashkëpunues konstruktiv me investitorin dhe qeverine, që përmes realizimit të kësaj project-ideje komplekse strategjike, infrastrukturore dhe urbanizuese, ndërtim vendbanimesh të reja përgjatë koridorit rrugor Lidhja e Prizrenit duke ruajtur njësitë aktuale komunitare, dhe duke shmangur shpopullimin e Dibrës, të maksimalizojmë përfitimet, kompensimin dhe dobishmërinë që do të vinin nga realizimi i HC-Skavicës dhe Rrugës Lidhje Shqiptare e Prizrenit
“Rruga Lidhja e Prizrenit do të kyçet me Rrugën e Arbrit dhe do të jetë e të njëjtës kategori C2, me të. Komuniteti dibran, tashmë ka një përvojë të mirë për nisma të tilla zhvillimore, pasi të organizuar e largëpamës, ne bëmë të mundur realizimin e projektit madhor, ndërtimin e Rrugës së Arbrit. Kjo nisëm, ka nevojë për mendimin, vullnetin dhe mbështetjen e çdo qytetari, banori të Dibrës, me qëllimin e mirë që sa më shpejtë të jetë realitet.” shkruan Uka.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
