Shpresat e kryeministrit britanik, Boris Johnson për t’i dhënë fund bllokimit të Britanisë së Madhe në 21 qershor,  varen nga të dhënat e fundit epidemiologjike.

Të dhënat e ditëve të fundit treguan një rritje të mëtejshme të rasteve të variantit Delta, i cili po përhapet me shpejtësi.

Kryeministri Johnson pritet të njoftojë të hënën nëse kufizimet do të vazhdojnë apo jo në javët në vazhdim.

Por, përhapja e shpejtë e variantit Delta, zyrtarisht një “variant shqetësimi”, i ka rrezikuar planet për lehtësim të masave, duke nxitur spekulime se data e 21 Qershorit do të shtyhet, ose disa kufizime do të mbeten.

“Duhet të jemi vërtet të kujdesshëm. Ne patëm një hapje shumë të madhe në 17 maj, ku njerëzit mund të takoheshin me miqtë në ambinete të mbyllura, në një restorant, në një pijetore”, tha ministri i vaksinave COVID-19 Nadhim Zahawi.

“Dhe unë mendoj se është e rëndësishme që ne t’i shikojmë të dhënat me shumë kujdes gjatë kësaj fundjave dhe pastaj t’i ndajmë me kombin”, tha ai më tej.

Rastet totale britanike të variantit Delta, të identifikuar së pari në Indi, janë rritur me 29,892 në 42,323, tha Shëndeti Publik Angli të premten, duke shtuar se varianti aktualisht përbën mbi 90% të rasteve të reja COVID-19.

Një epidemiolog i lartë britanik deklaroi të mërkurën se varianti Delta besohet të jetë 60% më i transmetueshëm se varianti Alpha.

Disa shkencëtarë kanë kërkuar një vonesë për lehtësimin e kufizimeve në mënyrë që më shumë njerëz të marrin një dozë të dytë vaksine.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.