QSPA, Qendra e Studimeve dhe Publikimeve për Arbëreshët u ka dhuruar kopje të botimeve të saj bibliotekës publike të Shkodrës “Marin Barleti” dhe asaj Françeskane.

Drejtoresha e QSPA Diana Kastrati u ka dhuruar nga dy kopje për secilin nga katër botimet e QSPA-së drejtorit të Bibliotekës “Marin Barleti” Maxhid Cungu.

Të dyja palët diskutuan për mundësitë e bashkëpunimit në fushat e kërkimit shkencor dhe të botimeve. Në përfundim të takimit, Cungu dhuroi për QSPA disa nga numrat e revistës Gegnia që boton Biblioteka “Marin Barleti”.

Më pas stafi i QSPA_së realizoi një vizitë pranë Bibliotekës Françeskane në Shkodër, në prani të drejtuesit të kësaj biblioteke Pader Vitor Demaj. Gjatë takimit u realizua akti i dhurimit të kopjeve të librave të botuar këtë vit nga QSPA dhe u diskutua për projekte të përbashkëta që mund të realizohen në vijim, dhe konkretisht për botim të studimeve, dokumenteve dhe dorëshkrimeve që klerikët françeskanë kanë mbledhur dhe ruajtur mbi jetën dhe veprat e arbereshëve.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.