Italia klasifikoi dy qytete dhe dy komuna të Romës si zona të kuqe sa i përket rrezikut nga COVID-19, teksa kuota e infeksioneve mbetet e lartë dhe variantet e reja të virusit janë përhapur masivisht në vend.

Sipas Ministrisë së Shëndetësisë, vendi regjistroi thuajse 15 mijë raste të reja në 24 orët e fundit, duke e çuar totalin në thuajse 2.8 milionë. Numri i viktimave u rrit ndërkohë me mbi 250 njësi, duke arritur mbi 95 mijë e 400 raste.

Në rajonin qendror të Lacios, ku ndodhet dhe kryeqyteti italian, një dekret u nënshkrua që klasifikonte dy qytetet dhe dy komuna të Romës si zona të kuqe, ku kontrollet dhe masat do të jenë më të rrepta përgjatë dy javëve të ardhshme.

Në zonat në fjalë, të gjitha restorantet dhe baret janë mbyllur, me përjashtim të atyre që ofrojnë ushqim me vete ose e shpërndajnë atë nëpër shtëpira. Gjithashtu, të mbyllura janë edhe dyqanet që nuk janë të nevojshme.

Ish-kryeministri italian, Giuseppe Conte nxori një dekret nëntorin e kaluar, që përforconte sistemin italian të mbrojtjes me tre nivele, duke i klasifikuar rajonet në zona me ngjyra, në bazë të indeksit të rrezikut.

Që atëherë vendi është ndarë në tre zona: të verdha, të cilat janë të sigurta; portokalli, ku niveli i rrezikut është i mesëm; dhe i kuq, ku rreziku është i lartë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.