Mark Gjonaj, kryetari i Këshillit Koordinues të Diasporës thotë se ndihen keq që akoma Diaspora nuk gëzon të drejtën e votës. Ai thotë se ky premtim është bërë nga të gjithë liderët dhe politikanët por nuk ka pasur vullnet për ta realizuar.

Vota e shqiptarëve jashtë vendit tashmë duket zyrtarisht se nuk do të jetë e pranishme as këto zgjedhje. Ndërsa në Kosovë, përmes postës mbërritën të paktën 100 mijë vota, dhe mijëra votues të tjera mbërritën në Prishtinë me avionë për t’iu bashkuar votuesve në zonat e tyre.

“Ky është mashtrimi më i madh që kur është hapur Shqipëria (rrëzimi i komunizmit)”, tha Gjonaj për “Euronews Albania”, edhe pse shton se akoma ka kohë për ta realizuar për zgjedhjet e 25 prillit.

Sipas Mark Gjonajt i gjithë problemi qëndron tek mungesa e vullnetit. Ai tregon shembullin e Kosovë që në zgjedhjet e vitit 2010 kishte vetëm 5 mijë votues nga Diaspora ndërsa në zgjedhjet e fundit kishte 175 mijë votues të regjistruar.

Z. Gjonaj nënvizon se sipas të dhënave të Komisionit Qendror Zgjedhor në Shqipëri rreth 40% e popullsisë jeton jashtë territorit të vendit dhe bëhet fjalë për mbi 1 milion qytetarë dhe nga këta vetëm 32 mijë janë të regjistruar.

“Kjo është qesharake, në kohë të nevojës dhe ditë të vështira i kanë gjet shqiptarët se ku janë, jo më larg se tërmeti. Sot kur mund t’i gjesh me anë të teknologjisë vetëm vullneti mungon. Liderët që kemi nuk duan që Diaspora të marri pjesë në zgjedhje”, përfundon z. Gjonaj.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.