Këshilli Koordinues i Diasporës i ka bërë ftesë publike institucioneve përgjegjëse për votën e shqiptarëve jashtë vendit për një takim online të hënën ku shpresojnë të jepet një zgjidhje për këtë çështje.

“Komisioneri i KQZ është i gatshëm, e ka pranuar ftesën, ne u kemi dërguar detaje të gjithëve për komunikim ditën e hënë dhe të shohim pjesëmarrjen, që të gjitha palët ta marrin këtë ofertë seriozisht, të kenë përfaqësuesit e tyre dhe të kenë mundësi të japin zgjidhje, domethënë është mënyra më e mirë. Ne do insistojmë dhe do kërkojmë të drejtën që na kanë premtuar. Çfarë ndodh më tutje, konsekuencat janë të tilla, nëse palët politike që kanë me vite të tëra në çdo fushatë kanë premtuar Diasporës t’i mundësojnë të drejtën e votimit, ata duhet vetëm të pranojnë zgjidhjen optimale”, ka thënë Hyka në një lidhje televizive me Fax News.

Anila Hyka tregon se takimi u kërkua pas një vonimi të procesit dhe sot që flitet procesi duhet të ishte në fazën ku Diaspora duhet të ishte informuar të deklaronte me dëshirë për të votuar.

“Takimi u kërkua pasi e kemi parë një vonim të procesit. Sot që flasim duhet të ishim në fazën ku e gjithë Diaspora duhet të ishte e informuar të deklaronim dëshirën për të votuar. Pra, sistemi duhet të ishte i hapur dhe ne të gjithë të shprehnim dëshirën tonë. Kjo nuk është bërë sepse drafti është i bllokuar. KQZ dhe grupi i punës kërkon të kenë dakordësinë mes palëve politike, mesa kuptoj dhe brenda Rregullatorit që miratojnë kuadrin ligjor që hapin si të thuash dritën jeshile për të vazhduar dhe kjo ne na shqetëson dhe kërkohet të kemi qartësi dhe transparencë pse bllokohet kjo gjë dhe e dyta është të gjejmë një zgjidhje”, u shpreh znj. Hyka.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.