Kryeministri holandez Mark Rutte njoftoi sot një zgjatje të shumicës së masave anti-COVID-19, aktualisht në fuqi në Holandë, deri më 2 mars.

“Kemi arritur në përfundimin se është e pashmangshme zgjatja e bllokimit aktual pothuajse tërësisht deri më 2 mars”, tha Rutte gjatë një konference për shtyp për menaxhimin e krizës shëndetësore.

“Ne nuk mund ta injorojmë shfaqjen e shpejtë të variantit britanik dhe dimë se, nëse bëhemi shumë optimistë tani, së shpejti do të shohim shtimin e rasteve”, shtoi ai.

Autoritetet holandeze kanë njoftuar se numri i infektimeve është në rënie, por deri në dy të tretat e rasteve të reja të COVID-19 në vend janë të lidhura me të ashtuquajturin variant britanik.

Rutte theksoi se shtetrrethimi pritet të mbarojë më 10 shkurt, megjithatë shtoi se i ka kërkuar komitetit shkencor përgjegjës për këshillimin e qeverisë në menaxhimin e krizës shëndetësore që të shqyrtojë mendimin e tij.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.