Gazetari Ibrahim Xhemajli në një intervistë për emisionin “7pa5” në Vizion Plus foli rreth kufizimeve të reja me të cilat po përballet Danimarka për shkak të COVID-19.
“Danimarka i ka zgjatur kufizimet deri më datë 7 shkurt, gjithçka vijon të jetë e mbyllur”.
Ai tregon se lëvizja e qytetarëve lejohet, por pjesa më e madhe e bizneseve dhe institucioneve vijojnë të jenë të mbyllur: “Deri më 7 shkurt mund të lëvizim në shëtitje, por nuk mund të mblidhemi më shumë se pesë persona. Vijojnë të mbyllura pjesa më e madhe e bizneseve. Gjithashtu është e domosdoshme të mbahen maskat dhe të respektohen rregullat.”
I pyetur mbi pasojat ekonomike që do të ketë Danimarka për shkak të pandemisë, Xhemajli tregon statistikat e fundit sipas ekspertëve.
“Sipas ekspertëve Danimarkës do tí kushtojë 70 miliardë euro pandemia e COVID-19.”
Më tej ai ndalet edhe në procesin e vaksinimit, i cili ka nisur në Danimarkë në fund të dhjetorit, por gazetari Ibrahim Xhemajli nuk e shikon të drejtë shpërndarjen e vaksinave nga institucionet e BE-së. “Shteti ka porositur 22 milionë vaksina dhe procesi i vaksinimit ka nisur në fund të dhjetorit dhe deri më tani është vaksinuar 3 për qind e popullsisë. Më 27 qershor mendohet se e gjithë popullsia do të jetë vaksinuar. Unë mendoj se BE ka bërë një padrejtësi duke mos pasur një shpërndarje të mirë dhe të barabartë të vaksinave. Danimarka ka 6 milionë banorë dhe ka blerë 22 milion vaksina. Sigurisht që mendoj se pjesa tjetër do të dhurohen, siç edhe ndodhi me rastin e respiratorëve, ku një pjesë u dhuruan edhe për Shqipërinë.”
Gazetari Ibrahim Xhemajli njihet edhe për kontributin e tij si atdhetarë dhe nuk mbeti pa përmendur periudhën e nëntorit, kur masat kufizuese ishin më të lehta dhe ai tregon se ata arritën të festojnë fizikisht festën e Pavarësisë.
“Gjatë nëntorit kur masat ishin pak më të lirshme shfrytëzuam rastin dhe festuam 28-29 Nëntorin me prezencë fizike. Për ne ishte një lumturi e madhe që pavarësisht pandemisë arritëm ta festojmë ditën e pavarësisë.”
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.