Futbollistët shqiptarë që aktivizohen nëpër klubet Europiane, po kalojnë një formë mjaft të mirë, teksa shpeshherë, kanë qenë protagonistë absolutë me golat e shënuar dhe asistet e dhëna.
“Kurorën” e lojtarit më të vlerësuar sipas “Sofa Score”, për fundjavën që sapo lamë pas e mban mesfushori, Eduart Rroca, i cili rezulton futbollisti shqiptar me notën më të lartë. Mesfushori shkëlqeu me Istanbulsporin në këtë fundjavë, teksa shënoi dopietë golash dhe dha asist te goli i 3-3 në barazimi 3-3 të skuadrës së tij ndaj Bursasporit.
Por festa e golave kuqezi kishte nisur që ditën e shtunë, kur Bekim Balaj la gjurmën e tij në javën e 11-të të kampionatit austriak. Sulmuesi i Kombëtares shqiptare, i cili aktivizohet për ekipin e Shturm Graz realizoi golin që ngriu shifrat finale në 3-0.
29-vjeçari, i cili shkeli fushën e lojës në minutën e 73- të nuk vonoi shumë, pasi iu deshën vetëm pesë xhiro kronometri për të shkundur rrjetën dhe duke konfirmuar momentin e tij fantastik: 3 gola në katër ndeshjet e fundit dhe 7 në total për Balajn, i cili mund të kishte realizuar edhe një dopietë personale, por fati nuk ishte me të, pasi topi u stampua në shtyllë. Në fund të sfidës, ai meritoi notën 7.4 nga “Sofascore”.