Atomisti Jon Syla është pranuar për të studiuar fizikë dhe neuroshkencë në njërin ndër top universitetet më të mira të botës, në Harvard University në SHBA.

Ky sukses i jashtëzakonshëm i Jonit para së gjithash është rezultat i potencialit të tij intelektual, i talentit të tij për fizikë dhe i punës së tij të palodhshme.

Lajmin e ka bërë të ditur Instituti Atomi përmes Facebook-ut, ku thotë se ky sukses është rezultat i potencialit të Sylës, i talentit dhe punës së palodhshme.

“Veç këtyre, ky sukses i Jonit do të ishte shumë më i vështirë pa përkrahjen dhe investimin e vazhdueshëm të familjes, shkollës, mësimdhënësve, individëve e organizatave të ndryshme profesionale”, thuhet në njoftimin e Institutit Atomi.

Jon u zgjodh të përfaqësojë Kosovën, për herë të parë në histori, në Olimpiadën Evropiane të Fizikës të mbajtur në Riga, Letoni në 2019. EuPhO është një konkurs për nxënës të shkollave të mesme.