Shoqata humanitare “Nënë Tereza” në Namur, Belgjikë, me president Adnan Rexhepi do dërguar dy autoambulanca të kompletuara me të gjitha mjetet e ndihmës së parë në Preshevë.

Kjo shoqatë, krahas veprimtarisë kulturore, humanitare, shkollës shqipe dhe organizimit të konferencave prestigjioze mbi figurat kombëtare dhe historisë së kombit shqiptar në Belgjikë, prej vitesh po kontribuon bindëshëm në rritjen e sigurisë qytetare dhe shëndetësore në disa Komuna dhe Bashki të Kombit tonë, në Preshevë, Kosovë dhe Shqipëri.

“Sot, me ndihmën e Shoqatës “Nënë Tereza” Namur dhe sponsorizimin e dy vëllezërve patriotë, Shqiprim Salihu dhe Abdyl Salihu, u bë e mundur nisja për Preshevë e dy autoambulancave  të kompletuara me gjitha mjetet e ndihmës së parë. Dhe kjo ndihmë shkon falas për vëllezërit dhe motrat tona në Preshevë, që edhe pse në truall autokton shqiptar, ndodhen gjeografikisht padrejtësisht  nën regjimin serb, i cili i ka defavorizuar qëllimisht në investimet shoqërore dhe më tepër. Kombi është një, e duhet të funksionojë i pandarë!”, shkruan kreu i shoqatës Adnan Rexhepi.

Shoqata “Nënë Tereza” në dy vitet e fundit ka nisur edhe një autopompë zjarrëfikëse pranë Komunës së Preshevës, dhe me dy autoambulancat moderne, besojmë se ndihmojmë mjaft në rritjen e shërbimeve të sigurisë qytetare në Preshevë.

Kjo ndihmë u realizua me kontributin këmbëngulës e vullnetar të Preshevarit Adnan Rexhepi, me bashkëpunimin e  qendrës së sigurisë nga fatkeqësitë natyrore dhe ndihmës së parë, zona “Nage” Namur, vëllezërve Shqiprim e Abdyl Salihi, dhe kordinatorin nga Shqipëria, Arian Bajraktari.