Ka përfunduar barazim ndeshja mes shqiptarit Florian Marku dhe James Stewart, por boksieri shqiptar nuk ka qenë dakord me vlerësimin.
Boksieri shqiptar arriti të ishte më lart se kundërshtari dhe e detyroi anglezin të merrte veten në raundin e dytë, pas një “knock down”. 76-76 ishte rezultati në fund.
Pas ndeshjes ai u shfaq i habitur: “Si mund të jetë barazim, sidomos me raundin 10-8 kur e rrëzova poshtë. Rivali më goditi vetëm një herë. Për çfarë është boksi, për të goditur në doreza? Normalisht që e dua një ndeshje sërish, por a e njohin boksin këta gjyqtarë? A marrin vesh nga boksi. Unë e ula në tokë atë. A po talleni me mua që e vendosni barazim. Ai nuk më dha asnjë goditje të pastër”, është shprehur Marku pas ndeshjes me qeleshen shqiptare në kokë.
Kjo ishte ndeshja e tij e tetë në boksin profesionist dhe deri më tani regjistronte vetëm fitore. Pesë prej ndeshjeve boksieri shqiptar i kishte fituar me “Knock Out”. Ky është barazimi i parë në karrierë për të.