Ditën e shtunë, më 28 nëntor në Sidnej të Australisë organizata “Misioni i Shpresës’” ndau çmimet vjetore australiane të “Arritjeve të Muslimaneve në Sidnej”.
Për shkak të kufizimeve aktuale, “Muzeu Islamik i Australisë” priti të gjithë finalistët e Viktorias realizuar dhe lidhjet të drejtpërdrejta me Sidnein.
Kryetari i shoqatës Urim Balla tregon për “Diaspora Shqiptare” se “Shoqata Islamike Shqiptare-Australiane” (AAIS) u nominua për “Ngjarja e Vitit”, kur festoi 50 vjetorin e Xhamisë së Parë të Melburnit.
Aktiviteti i zhvilluar nga shoqata shqiptare ishte ndër tre finalistët dhe në fund shoqata shqiptare u shpall fitues.
Për të pranuar çmimin në emër të AAIS të pranishëm ishin Urim Balla (President i AAIS) dhe Iman Balla (Vullnetari AAIS).
Ky çmim vlerëson një ngjarje të jashtëzakonshme muslimane Australiane të mbajtur gjatë vitit të kaluar për komunitetin musliman.
Shoqata Islamike Shqiptare Australiane (Carlton) u themelua në vitin 1963. Kjo shoqatë vepron si qendër për ruajtjen e gjuhës, traditës, kulturës dhe besimit të komunitetit shqiptar musliman për brezat e ardhshëm. Në vitin 1969 shqiptarët krijuan një histori duke themeluar xhaminë e cila sot njihet në histori si xhamija e parë e ndërtuar në qytetin e Melburnit.
Në ambientet e kësaj xhamije u mbajtën dhe klasat e para për mësimin e gjuhës shqipe dhe në mungesë të një qendre shqiptarë të komunitetit kjo xhami u përdor për tubimin e shumë mbledhjeve të rëndësishme si ajo për grumbullimin e ndihmave financiare për të përkrahur luftën e Kosovës dhe janë marrë shumë vendime të tjera të rëndësishme.
Në vitin 2013 kjo shoqatë ndërtoi dhe qendrën e Rinisë “Youth Center” në Truganina ku sot përdoret si një tubim shoqëror i shqiptarëve musliman por edhe ku vazhdojnë klasat e mësimit fetar si dhe klasat e gjuhës shqipe, folklori shqiptarë si dhe shumë lojra sportive.
Me rastin e 50 vjetorit të themelimit të kësaj xhamije, vitin e kaluar këshilli i shoqatës Islamike Shqiptare–Australian organizoj një Carnival në rrugën Drummond në Carlton para xhamisë ku u bë një ekspozitë e historikut jo vetëm të kësaj shoqate, por edhe të shqiptarëve në përgjithësi ku pati të ftuar dhe mysafire të ndryshëm si dhe përfaqësues të shtetit lokal dhe atij federal. Në këtë ditë shkelqeu grupi folklorik i fëmijëve shqiptarë të shoqatës nën udhëheqjen e koreografit Kujtim dhe Ermira Zhubi. Po ashtu për herë të parë në historinë e qytetit të Melburnit u thirr dhe ezani nga minareja e xhamisë ku nderi i takoi Amet Balla.
“Ka qenë një organizim madhështor ku disa nga antarët tanë vullnetarë punuan për më shumë se 9 muaj për të organizuar këtë festival por që më në fund puna e tyre e palodhur u shpërblye me ketë çmim që fituam”, shprehet kryetari i shoqatës Urim Balla i cili falenderon AMAA për ketë çmim si dhe të gjithë ata që kontribuan për organizimin e këtij festivali.
