Pas përfundimit të ndeshjes me Bjellorusinë, ku Shqipëria siguroi ngjitjen e saj në Ligën B, futbollistët shqiptarë të klubeve italiane janë në vështirësi. Kjo pasi shumë prej tyre janë të detyruar të nisin karantinën pasi Shqipëria cilësohet zonë e kuqe për COVID-19 në këto momente.

Megjithatë, në këtë pikë rregullat janë shumë të paqarta dhe kjo kuptohet më së miri nga situata në Itali. Ledian Memushaj, sapo ka mbërritur në Peskara, ka bërë tamponin dhe ka rezultuar negativ. Por klubi ka vendosur që ai të mbyllej në shtëpi dhe të fillonte stërvitjen me grupin vetëm të mërkurën, dukë e izoluar për një javë lojtarin e përfaqësueses shqiptare.

Ndërkaq, te SPAL nuk dinë çfarë të bëjnë me Etrit Berishën. Futbollsiti ka udhëtuar nga Shqipëria dhe po ashtu ka rezultuar negativ ndaj tamponit. Në klub janë të pavendosur nëse portieri duhet të luajë apo jo këtë javë në Serinë B. Sot do të merret vendimi përfundimtar nëse portieri do të hyjë për disa ditë në karantinë, apo nëse do të vazhdojë rregullisht punën me ekipin e tij.