Presidenti Ilir Meta i ka dhënë dekoratën e lartë “Nënë Tereza” humanistit atdhetar Skënder Përpepaj. Meta e konsideroi një personalitet të veçantë me zemër të madhe, humanist të palodhur që është aq i lidhur me vendlindjen e tij.

“Ai ka qenë dhe mbetet një shembull i jashtëzakonshëm për të mos humbur dashurinë për atdheun e vendlindjen, dhe për të mbështetur në një mënyrë bujare dhe konkrete vendlindjen e tij, Tropojën, Shqipërinë dhe Kosovën”, tha Meta.

Ashtu siç ka thënë dhe Nënë Tereza tha Meta, edhe atdhetari Përpepaj ka bërë gjëra të mëdha dhe me dashuri të madhe.

Skënder Përpepaj jeton prej vitesh në Londër por gjithmonë ka kontribuar në zhvillimin ekonomik, kulturor e politik të Shqipërisë. Ai është nismëtar e kontributori kryesor i ndërtimit vullnetar të Rrugës për në Curraj të Epër, e cila mori kështu dhe një hov turistik.

Kompania e tij në Britani është përzgjedhur nga Parlamenti Britanik si një ndër rreth 20 kompanitë më të mira për vitin 2019-2020.