Florian Marku është një nga boksierët me origjinë shqiptare më premtues në Britaninë e Madhe. The Sun i ka dedikuar një artikull sportistit në këto kohë të vështira pandemie.

Për herë të parë Florian Marku do të ketë ndeshje pa tifozë, ndërkohë që vitin e kaluar 28-vjeçari shqiptar dhuroi spektakël mes 1200 vetëve në Londër.

The Sun flet për trashëgiminë e përbashkët ballkanike, shpirtin luftarak teksa tregon se Marku kishte në anën e tij të djathtë asin e Liverpoolit, Xherdan Shaqiri dhe atë të Arsenalit, Granit Xhaka. Por fatkeqësisht asnjë prej tyre nuk mund të jetë në ndeshjen e radhës të Florian ndaj Muma Mvceeba.

“Për tifozët në Mbretërinë e Bashkuar unë jam i ri, por në Shqipëri, Greqi, Austri dhe të gjithë Europën kam shumë tifozë sepse kam pasur mbi 100 ndeshje në Kikboks dhe MMA, fitova tre tituj botërore dhe dhjetë vjet pa asnjë humbje”, ka thënë ai për SunSport.

“Në korrik të 2019 shita rreth 800 bileta për ndeshjen në O2, por e di që vërtetë 20% e tyre janë miq dhe familjarë. Pjesa tjetër janë tifozë që ndoshta nuk i kam takuar kurrë, madje kanë qenë dy djem që fluturuan nga Australia.”, vijon Marku.

Gjëja më e mirë për ne shqiptarët thotë Floriani është se qëndrojmë në kontakt me njëri-tjetrin në të gjithë botën, duke folur për miqësinë e tij të ngushtë me Xhakën, Shaqirin e Shkodrani Mustafin.

Floriani tregon se shumë shqiptarë që kanë shkuar në Angli nuk ia kanë dalë dot dhe kur ata shohin dikë nga vendi i tyre e mbështesin. “Në Shqipëri e Kosovë kemi pasur luftëra shumë të këqija dhe gjithçka ka qenë jo e qëndrueshme, gjërat kanë qenë të qeta këto dhjetë vitet e fundit, por jemi ende vende të varfra”, vijon ai.

Marku u zhvendos në Greqi kur ishte katër vjeç, gjatë trazirave të 1997 në Shqipëri. Atje ai nisi karrierën e tij të gjatë.