Mjeku shqiptar në Londër, Adrian Fandi, mjek i urgjencës, i cili edhe vetë ka fituar betejën me COVID-19, tregon për situatën e përballimit të koronavirusit në Britaninë e Madhe dhe masat që kanë marrë autoritetet për të kufizuar përhapjen e virusit. Ai shprehet në një intervistë në “Euronews”, se në këto momente mund të mbrohemi nga koronavirusi duke dal vetëm kur kemi nevojë për të dalë, jo të dalim e të takojmë njeri-tjetrin duke e përhapur, si dhe duke mbajtur distancën dhe duke mbajtur gjithnjë maskën.
“Kur flasim për pandemi duhet të dimë se çdo vend është një vatër dhe çdo njeri mund të jetë potencial për të infektuar tjetrin. Mbyllja e shkollave nuk tregoi se pati rezultat. Fëmijët janë ata që kanë shumë pak simptoma ose aspak. Nuk ka shumë rëndësi mbyllja në këtë periudhë, por kujdesi, mbajtja e maskës, sepse mbajtja e maskës e pengon virusin që të kalojë tek personi tjetër. Me maskë merr me pak dozë të virusit dhe e kalon më lehtë. Ndërsa në club-e e pub-e sigurisht duhet të mbyllen, sepse aty njerëzit nuk mbajnë maska dhe aty spërklat janë më të shumta, sepse në një pub për shembull ne flasim me zë të lartë dhe lëshojmë më shumë spërkla.”
Mjeku Fandi tregon se prej 4 ditësh rastet janë shtuar ndjeshëm në Britaninë e Madhe.
“Unë punoj në një vend ku ka pacient me virus dhe them se kemi njerëz pozitiv me koronavirus dhe njerëz të sëmurë me koronavirus. Nga e enjtja e deri tani kemi pasur shtim të rasteve që kanë nevojë për shërbim spitalor, gati 2-3 raste në orë nga 2-3 raste në ditë që ishte më parë. Arsyeja nuk dihet fikse, por mbase lidhet me kohën. Maska në Anglin në rrugë nuk ishte me detyrim, dhe Shqipëria ka bërë shumë mirë me rregullin për ta mbajtur në rrugë, sepse tani është shumë e rëndësishme që maska të mbahet në rrugë dhe të mbahet në mënyrë të rregullt, jo vetëm për të mos marrë gjobën. Unë vetë e kam kaluar në prill Covidin në gjendje shumë të rëndë, kam qenë i shtruar pesë ditë dhe ishte një periudhë e vështirë. Edhe pse e kam kaluar dhe kam imunitet unë sërish nuk heq dorë nga përdorimi i maskës edhe jashtë spitalit. Këto ditë ka vazhduar fluksi dhe ka njerëz që presin gjatë për një shtrat. Mosha më e madhe janë 40 deri në 70 vjeç, sepse janë mosha më aktive”.
