Anaida Deti është larguar nga Shqipëria në 1997. Pasi jetoi mbi 5 vite në Itali, u zhvendos në Kanada. Studimet e saj në degën e stomatologjisë në shtetin italin nuk iu njohën dhe iu desh të nis gjithçka nga e para.
Në një intervistë për Businessmag ajo tregon: “Anglishten e flisja shumë pak, kishim mësuar në shkollë, po nuk e kisha praktikuar, mësimi në shkollë ishte shumë bazik dhe për t’u kuptuar ishte shumë e vështirë nga theksi që njerëzit kishin këtu. Fillova të mësoja anglishten (ESL). Mora diplomën e gjimnazit dhe nisa studimet në kolegj si asistente në një klinikë dentare. Punova një vit e gjysmë, po doja të bëja diçka më tepër”.
Më pas Anaida Deti vendosi t’i kthehet sërish studimeve dhe kësaj radhe studion si higjeniste dentare për dy vite.
Tashmë ajo zotëron licensën shtetërore prej 10 vitesh dhe ka hapur klinikën e saj dentare Dental X, pas dy vitesh eksperience pune në klinika të ndryshme.
“Në fillim kam ndarë hapësirën me profesionistë të tjerë dentarë në 3 klinika të ndryshme, po ishte shumë e vështirë se kishim vizione te ndryshme mbi biznesin dhe trajtimin e klientëve. Klinikën time e kam hapur në Maj të 2016 pas 9 muajsh kërkimi”, thotë Anaida.
Fillimi i saj ishte shumë i vështirë dhe mezi priste të binte telefoni e të hapej dera. Por, tani gjërat kanë ndryshuar dhe stomatologia shqiptare është mjaft e kënaqur. Klinika e saj trajton mbi 3,000 pacientë dhe ka një staf me stomatologë të kombësive të ndryshme. Mes sfidave ajo rendit gjuhën dhe shkollimin nga e para.
“Më është dashur të shkoj në shkollë e të punoj pas shkolle. Ditë të gjata e të lodhshme me punë të ndryshme, në supermarkete, etj., deri sa mbaroi shkollën. Sfidë tjetër ishte të jesh mama dhe të kesh biznes. Ndërkohë që shkoja në shkollë dhe punoja, kisha dhe djalin shumë të vogël dhe shumë herë isha pa gjumë dhe më duhej të vazhdoja me ditën edhe pse pa pushuar fare. Kur linda vajzën, pas tre ditësh më është dashur të kthehem në punë. Është shumë e vështirë të menaxhosh familjen dhe biznesin në të njëjtën kohë, pasi nuk je në punë 9 me 5, por puna nuk mbaron kurrë, edhe kur je jashtë klinikës.”
Por Anaida Deti tregon se edhe po të kthehej pas në kohë, e vetmja gjë që do të bënte ndryshe, do të ishte kalimi i një kohe më të gjatë me fëmijët.
“Fëmijët rriten shumë shpejt dhe ato momente kur janë të vegjël nuk kthehen kurrë më. Prandaj mundohem të kaloj sa më shumë kohë me ta dhe të udhëtojmë sa më shumë së bashku që të krijojmë sa më shumë kujtime”.
Ndërkohë, objektivat e saj janë të shumtë. Ajo tregon se është në procesin e firmosjes së kontratës për të hapur klinikën e dytë të DentalX dhe synon që në të ardhmen të ketë disa klinika.
Ajo sheh shumë mundësi për zhvillim biznesi edhe jashtë Shqipërisë dhe inkurajon të rinjtë të punojnë fort për të plotësuar ëndrrat e tyre. Mund të jetë shumë e vështirë, por jo e pamundur. Me shumë punë dhe vendosmëri çdo gjë është e mundur, sipas saj.
