Shteti italian i ka dhuruar Bashkisë së Durrësit 5 automjete të reja zjarrfikëse. Në ceremoninë që u zhvillua mbrëmë në portin e Durrësit, Ambasadori Italian Fabrizio Buçi foli për miqësinë mes dy vendeve dhe procesin e integrimit të Shqipërisë.

Ambasadori italian në Tiranë Fabrizio Buçi, thotë se Shqipëria është në rrugën e duhur në lidhje me procesin e integrimit, ndërsa shpreson që BE të hapë negociatat me Shqipërinë vitin e ardhshëm.

“Ne sinqerisht shpresojmë që Shqipëria të hapë negociatat me BE vitin e ardhshëm. Italia gjithmonë e ka mbështetur këtë proces dhe do të vazhdojë ta bëjë këtë në të ardhmen. Për ne është një proces shumë i veçantë për të cilin ne jemi të lumtur, sepse kjo do të thotë që Shqipëria më në fund do të jetë pjesë e familjes së madhe evropiane, dhe kjo është vetëm çështje kohe. Ne jemi këtu dhe do t’ju ndihmojmë dhe do të punojmë së bashku ditë pas dite derisa të mbërrijë ai moment i shkëlqyeshëm dhe pastaj do të festojmë së bashku ardhjen e atij momenti,” tha Buçi.

Ambasadori e bëri këtë deklaratë të Premten në mbrëmje në portin e Durrësit, ku u mbajt ceremonia me rastin e dorëzimit të 5 automjeteve të reja kundër zjarrit. Këto automjete janë një dhuratë nga zjarrfikësit italianë për Bashkinë e Durrësit.

“Zjarrfikësit tanë së bashku me Mbrojtjen Civile dhe Guardia di Finanza ishin të parët që ishin këtu për të ndihmuar vëllezërit tanë shqiptarë. Dhe ne jemi përsëri këtu sepse nuk harrojmë. Italia është një vend i shkëlqyeshëm që nuk harron kurrë vendet miqësore si Shqipëria. Ne jemi këtu dhe do të jemi gjithmonë pranë jush. Kjo marrëveshje, midis zjarrfikësve tanë dhe Bashkisë së Durrësit, së bashku me këto automjete do t’i shërbejnë sigurisë së qytetit ”, tha Buçi.