Pianisti Viktor Guraziu rikthehet në atdhe për të interpretuar sonatën e Bethovenit në ish-kampin e internimit të Tepelenës. Pianisti shqiptar, Viktor Guraziu i cili jeton në Itali u shkollua që në moshën 10 vjeçare pranë Konservatorit “G.Tartini” të Triestes dhe u diplomua nga Konservatori “B. Marcello”, Venecia e Universität Muzarteum, Salzburg.

Ai është fituesi i çmimit “Alfredo Casella” në edicionin e fundit të konkursit prestigjioz “Premio Venezia” dhe është pjesë aktive e skenave të qyteteve kryesore italiane.

Performanca e tij e re në vendlindje do të jetë në koncertin “Tinguj në Heshtje”, që do të mbahet më 1 shtator në qytetin e Tepelenës, në kuadër të projektit “Remote”.

“REMOTE është një projekt i financuar nga INTERREG IPA CBC – ITALY – ALBANIA – MONTENEGRO me partner kryesor Teatro KOREJA në Lecce, Itali, dhe M.A (Multidisciplinary Arts ),i cili ka për qëllim të çojë vëmendjen drejt hapësirave të braktisura të kujtesës kolektive për ti dhënë një shtysë zhvillimit të turizmit kulturor.
Në kuadër të këtij programi, M.A organizon në Tepelenë pranë ish kampit të internimit një seri aktivitetesh.
Art, Arkitekturë, Muzeologji.
Ju mirëpresim 31 GUSHT DHE 1, 2 SHTATOR”, shkruhet nw njoftimin e Multidisciplinary Arts.