“Festivali i Fanos dhe Takimi i shkrimtareve te Diasporës, ura lidhëse për prezantimin e autorëve shqiptarë” ky është përfundimi që ka nxjerrë gazeta italiane “Corriere Della Sera” në një shkrim dedikuar edicionit të tetë të festivalit letrar “Passaggi”.

“Dy vende të ndara nga i njëjti det, Adriatiku, ndërtojnë një urë në Fano. Në edicionin e tetë të festivalit Passaggi që fillon ditën e mërkurë, 26 gusht dhe përfundon ditën e diele, 30 gusht, Shqipëria, protagoniste e një prej paraqitjeve më në zë të librit, e vetmja qe i kushtohet rrëfimit: “Evropë / Mesdhe”, nis shkrimi i gazetës italiane e cila sqaron se ky seksion lindi si një dëshirë për të çuar në qytezën italiane letërsinë e “fqinjëve të shtëpisë” dhe në mënyrë të veçantë autorët e Ballkanit.ë

Këtë vit fokusi u kushtohet shkrimtarëve shqiptarë që jetojnë në Itali ku të ftuar do të jenë autorët Durim Taçi, Arben Dedja dhe Elvis Malaj.

Durim Taçi do të prezantojë romanin e tij “Extra Time”, brenda revistës së tregimit ” Evropë / Mesdhe”, ndërsa Arben Dedja do të prezantojë “Trattato di medicina in 19 racconti e 1/2” (Traktati mjekësor në 19 tregime e 1/2). Formati i prezantimit do të përfshijë një bisedë një-orëshe me një gazetar ose kritik letrar.

“Passaggi Festival” lindi në 2013 në Fano, i konceptuar dhe drejtuar nga gazetari Giovanni Belfiori së bashku me historianin Claudio Novelli. Ky festival është evenimenti më i madh veror italian kushtuar librit dhe promovohet nga shoqata “Passaggi Culture”. President i Festivalit Passaggi është z. Cesare Carnaroli.

Në këtë edicion do të jetë prezente edhe ambasadorja shqiptare në Itali, Anila Bitri Lani, e cila do të marrë pjesë në festival më datë 29 e shoqëruar nga Atasheu kulturor, Ledia Mirakaj.