Ministria e Financave dhe Ekonomisë ka mbyllur sot diskutimet me Misionin e Fondit Monetar Ndërkombëtar në platformat virutale. Diskutimet janë kryesuar Ministrja Znj. Anila Denaj dhe Znj. Yan Sun, Shefe e Misionit për Shqipërinë, gjatë periudhës 25 Qershor-1 Korrik.
Sipas njoftimit zyrtar të ministrisë, diskutimet gjatë këtyre takimeve u fokusuan në zhvillimet makroekonomike e fiskale dhe perspektivën e tyre gjatë 2020, duke marrë parasysh efektet e tërmetit të vitit të kaluar, si dhe ato të pandemisë globale të COVID-19.
Të dy ekipet ndanë mendimet për efektin e pandemisë në ekonominë shqiptare për vitin 2020 dhe rritjen e ekonomisë për vitin 2021.
Parashikimet e Ministrisë së Financave dhe Ekonomisë në terma nominalë janë të ngjashëm me ato të Fondit Monetar Ndërkombëtar, por mbeten përgjithësisht më optimiste.
Ministria e Financave dhe Ekonomisë vlerëson së ndryshimi i parametrave fiskalë është i përkohshëm dhe i imponuar nga dy goditjet e një pas njëshme që mori vendi.
Znj. Denaj shprehu angazhimin e vazhduar të Qeverisë Shqiptare drejt konsolidimit fiskal dhe zbatimit të reformave në fushën e financave publike për të siguruar indikatorë të shëndoshë makroekonomikë, qëndrueshmëri dhe një buxhet për qytetarët shqiptarë, qasje kjo e përbashkët me ekipin e FMN-së.
“Rishikimi i Buxhetit të vitit 2020, pas pandemisë do të kërkojë zgjerim të hapësirave fiskale, me një rritje të mëtejshme të deficitit buxhetor, duke mundësuar jo vetëm vazhdimësi të Projekteve prioritare që gjenerojnë punësim dhe rritje të ekonomisë, por edhe Projektet e Rindërtimit” theksoi Znj. Denaj.
Ulja e qënësishme e borxhit publik dhe rikthimi në një balancë primare pozitive në vitin 2022, është në planifikimet paraprake të Ministrisë së Financave dhe Ekonomisë.
Pritshmëritë për të ardhurat pas vitit 2020, janë të larta, si rrjedhojë e zbatimit të Projektit të Fiskalizimit dhe të Strategjisë Aftamesme të të Ardhurave, duke mbështetur edhe sektorin privat me politika që stimulojnë konsumin dhe formalitetin.
Fondi Monetar Ndërkombëtar vlerësoi indikatorët e qendrueshëm makroekonomikë dhe nevojën e pranueshme për të rritur deficitin përgjatë vitit, si përgjigje për situatën ekonomike të vendit por edhe atë botërore. Më tej, ata vlerësuan mbështetjen e dhënë në drejtim të qytetarëve, duke theksuar nevojën që kjo e fundit të jetë e targetuar dhe e përkohshme.
Ekipi i Ministrisë së Financave dhe Ekonomisë gjatë takimeve me Misionin ka diskutuar gjithashtu proceset e ndjekura për të siguruar rimbursimin e TVSH-së dhe zerim të stokut për të gjithë tatimpaguesit, nismat e fundit të Qeverisë për rritjen e pragut të TVSH-së dhe eliminimin e tatimit mbi fitimin për biznesin e vogël, hapat për reduktimin e borxhit publik në afatmesëm etj.
Paketat e Qeverisë Shqiptare kanë vijuar shpërndarjen me efektivitet dhe në respektim të plotë të procedurave të parashikuara, për një mbështetje sa më efektive dhe të shpejtë për qytetarët dhe bizneset, thuhet në njoftimin zyrtar të ministrisë. Scan
