Ish-studenti Rexhinaldo Nazarko, anëtar i “Emgage USA”, një shoqatë e cila merret më të drejtat e njeriut në SHBA, është një nga shqiptarët që ka qenë më së shumti aktiv në protestat atje. Këto protesta ishin fillimisht kundra policisë ndërsa më vonë u kthyen degraduan në përdorimin e dhunës, shkatërrimeve masive të departamenteve policore, por jo vetëm.
Në një intervistë për AlbtvUsa, Rexhinaldo tregon arsyen e përfshirjes në këto protesta.
“Arsyeja kryesore që përse u frymëzova që të dilja në Detroit është parimi i sistemit të drejtësisë në Amerikë. SHBA falë kushtetutës që na është paraqitur nga baballarët e kombit, sic i quajmë hapin rrugën teknikisht në fletë për një drejtësi të barabartë për të gjithë, pa diskriminim ngjyre, pa diskriminim feje apo besimi. Edhe unë jam potësisht një besimtar i fortë i parimeve kushtetuese amerikane të lirisë, barazisë dhe parimet që ne përpiqemi dhe eksportojmë në glob.
Kjo ka qenë shtysa ime kryesore, duke parë një sistem drejtësie asimetrik që nuk aplikohet në mënyrë të barabartë në shtresa të ndryshme të shoqërisë, sidomos nga sistemi policer dhe kur flas për sistemin policor nuk po flas për policë individë sepse individi nga kolektiva është e ndryshme, më frymëzoi dhe mora shtysën që të ngrihesha dhe të shprehja zërin tim bashkangjitur me qytetarë të ndryshëm amerikanë,”- shprehet Rexhinaldo.
Qytetarët që morën pjesë në protesta, sipas Rexhinaldos donin të tregonin se ne jemi këtu për të riformuar dhe kthyer balancën sistemit.
“Kjo është një balancë që duhet. Edhe pse jemi në një akt rebelimi ligjor ndaj shtetit, kjo është e nevojshme. Por kishte grupe anarkiste ose grupe që janë të keqinformuara nga ana historike, të keqinformuara nga ana politike dhe janë më shumë të shyra nga pasioni dhe nga zjarri sesa nga logjika,”- vijon më tej ai.
Duke qenë se protestat e qytetarëve ishin të dhunshme, edhe policia u detyrua të përgjigjej në të njëjtën mënyrë. Sjelljen e uniformave blu, Rexhinaldo e krahason me nivelet ushtarake.
“Policia në shumë qytete të SHBA ka arritur një nivel ushtarak, pseudo-ushtarak. Janë bërë grupe paramilitare. Qëllimi i policisë nuk është të jetë ushtri sepse ushtria ekziston dhe ushtria ka rregullat e veta, angazhimin, eksperiencën e vet ndërsa ne kemi arritur në një pikë sa kemi armatosur policinë, të cilët janë të trajnuar të merren me krime qytetare, jo me rebelim të cilët njerëz që nuk janë të trajnuar për këto lloje situatash, procedojnë nga instikti njerëzor.
Përpos policisë, Nazarko ngre shqetësimin se protestat dobësuan edhe sistemin gjyqësor.
“Sistemi gjyqësor është dobësuar. Kemi një mosbarazi se si gjykohen grupet jo-minoritare dhe si gjykohen grupet minoritare në bazë të të njëjtave krime.”- shprehet ai.
Protestat në SHBA morën indicie nga vdekja e 46-vjeçarit George Floyd në shtetin amerikan të Minnesotat pasi një oficer policie mbajti gjurin e tij mbi qafën e viktimës për pothuajse nëntë minuta. Fjalia e fundit e viktimës, “Nuk mund të marr frymë”, u bë slogani i protestave mbarëkombëtare.
