Personazhe të njohur të artit, muzikës dhe kulturës shqiptare, pas periudhës së vështirë të pandemisë, nëpërmjet një videoje ftojnë të gjithë shqiptarët që të vizitojnë vendlindjen e tyre për pushime.

Balerini i njohur shqiptar Kledi Kadiu, modelja Emina Çunmulaj, grupi muzikor Elita 5, këngëtari Sabri Fejzullahu, nëpërmjet video-mesazhit rendisin disa arsye se përse duhet të zgjedhim Shqipërinë për pushime.

Balerini i famshëm shqiptar Kledi Kadiu shprehet: “A e dimë sa të bukura janë vendet tona? Aty ku zemra jote thërret. Aty ku na bashkon një qiell. Të njëjtat dëshira. Shqipëria. Eja në shtëpinë tënde”.

“Aty ku janë kujtimet e vjetra e të presin të rejat. Eja në shtëpinë tënde. Kthehu në Malësinë tënde”, shprehet modelja Emina Çunmulaj.

“Aty ku Zoti na bekoi me çdo të mirë. Mësojmë. Shijojmë. Argëtohemi. Eksplorojmë “, theksojnë pjesëtarët e grupit muzikor Elita 5.

“Eja në shtëpi. Është fole e jotja sot e një mijë vjet Kosova”, shprehet këngëtari Sabri Fejzullahu.

Video është një realizim i Unionit Rajonal të Bashkive Shqiptare, pjesë e nismës për promovimin e turizmit lokal.

Sot Shqipëria, turizmi i saj, ka nevojë për çdo pushues, që të rimëkëmbë ekonominë  për shkak të krizës që po kalon vendi si pasojë e Covid-19.