Malësia e Madhe është në Shqipëri eksportuesi kryesor i bimëve aromatiko-mjekësore. Rreth 80 përqind e këtyre bimëve eksportohen në Shtetet e Bashkuara të Amerikës dhe në Europë.
Agronomi Agim Rama thotë për Zërin e Amerikës se, prej dhjetë vitesh, kultivimi dhe grumbullimi i bimëve aromatiko-mjekësore është drejtimi kryesor i fermerëve në Malësi të Madhe për të përftuar të ardhura. Sipas tij, 4 mijë familje merren me kultivimin dhe grumbullimin e këtyre bimëve.
“Ka dhjetë vite që Malësia e Madhe ka marrë drejtim të duhur në kultivimin e bimëve aromatiko-mjekësore. Janë 4 mijë familje që merren me to. Dikush gëzon 5 dylym, dikush ka 1 hektar tokë, por të gjithë e gjejnë veten, sepse këto bimë i japin akses ekonomik.
Sot në Malësi të Madhe numërohen 4500 hektarë me këto bimë aromatiko-mjekësore, ku 3500 hektarë janë me sherebelë, 200 hektarë janë me lavandë, etj. 80% e tyre shitet në Amerikë dhe në Europë. Kemi bërë një punë shumë të mirë gjatë këtyre viteve, jemi orientuar drejt diversifikimit. Kemi futur bimë si rigonin, për të pasur në treg një gamë më të gjerë”, shprehet Agim Rama.
