Futbollisti shqiptar Xherdan Shaqiri është identifikuar si një përforcim i mundshëm për klubin e Newcastle, sipas “Daily Mail”. Newcastle duket se do të shfrytëzojë faktin që Shaqiri ka gjetur shumë pak hapësira te “The Reds”.
Përfaqësuesi i kombëtares zvicerane, u mor dy vite më parë në Liverpool si alternativë e krahut të majtë me 13.5 milionë stërlina. Ai luajti një rol të rëndësishëm në sezonin e tij të parë, pasi e ndihmoi skuadrën të fitonte Champions-in.
Sezoni aktual rezultoi i komplikuar për futbollistin nga Gjilani. Ai u aktivizua në vetëm dhjetë ndeshje, dhe për herë të fundit u fut si zëvendësues në minutën e 89-të kundër Tottenhamit.
Shaqiri u kërkua në janar nga Roma dhe Sevilla, por Liverpooli nuk ishte i gatshëm ta huazonte 28-vjeçarin, pasi ishte ende në garë në tri fronte dhe mendonte se do t’i vlente në një moment të veçantë.
Newcastle mendohet se nuk do të ketë konkurrentë për kartonin e Shaqirit, pasi nuk do t’i mungojnë paratë që parashikohet të vijnë nga sheikët arabë.
Shaqiri ka edhe tri vite kontratë por pritet të jetë në merkaton e verës pasi Liverpool nënshkroi në janar me futbollistin 25-vjeçar, Takumi Minamino, nga Red Bull Salzburg.
