Në këtë periudhë shumë shtete të Europës kanë nisur hapjen e tyre duke përfshirë edhe hapjen e kufijve në mënyrë graduale. Gjithashtu edhe Sllovenia ka prezantuar regjimin e ri të kalimit nëpërmjet kufijve të saj, por siç thuhet në njoftimin e Ambasadë nuk ka lehtësime për shtetasit shqiptarë dhe shtetasit e tjerë të vendeve të treta që lëvizin drejt vendit të tyre përmes Sllovenisë.

Shtetasit e vendeve të BE-së mund të hyjnë në territorin slloven nga Austria, Italia dhe Hungaria, nëse nuk janë infektuar apo paraqesin simptoma të Covid-19 dhe gjithashtu nuk i nënshtrohen karantinës dy javore. Shtetasit e vendeve të treta, ku përfshihen edhe ata shqiptarë, që hyjnë në Slloveni për arsye të përcaktuara, por jo që të udhëtojnë drejt Shqipërisë, kanë detyrimin e karantinës dy javore.

Shtetasit shqiptarë që udhëtojnë drejt Shqipërisë duke hyrë në territorin slloven nga Austria, Italia dhe Hungaria, iu ndalohet të hyjnë në Slloveni, nëse më parë nuk u është dhënë leje e konfirmuar nga shteti kufitar drejt të cilit ata udhëtojnë. 

Për çdo informacion shtesë, ambasada fton qytetarët të kontaktojnë në numrin e emergjencës të Ambasadës: +386 31 240 760.